" Quand tot lo manja, tot lo caga. "

" Vai te'n cagar a la vinha e pòrta-me la clau. "

Vocabulari:

cagar = "aller à la selle" , chier;

las cagadas = les erreurs, les conneries ( las conariás );

cagarèl ! = terme injurieux , reviri pas! ;

lo cagador = les cabinets, les chiottes, les "cagouinces";

la caganha = la courante.

Uèi, lo vocabulari es especial, d'acòrdi; mas, de còps, nos cal anar querre çò qu'es familiar, per de rire e canbiar un pauc. Macarèl!

_________________

*

L'Alan.

Òc, es atal, i a plan mai d’una causa que pòdi pas encapar ! Aquí una primièra tièra (mas, probable qu’un còp o l’autre, i tornarem) :

 
-  Los jeans nòus traucats de fresc al ginolh que te daissan veire l’articulacion propreta e linja, alara que l’espèras plan coronada, amb de crostas e de sang que raja, un pansament que penjòrla dessús, unas colors improbablas aprèp una trabucada e una genuflexion sens cadièra de glèisa a la recepcion que justificarián d’aver traucadas las bragas !

 
-  Non solament pas encapar, mas pas engolir tanpauc : l’ensalada de bledarava e los grans de milh dins d’ensaladas. Pensatz que lo bon gost de la bledaraba se torna trapar (bon, infinitesimal mas quand même..) dins lo cambajon del pòrc e que lo milh transformat en fetge gras es vertadièrament mai gostós. Vesi pas perqué d’unes s’acaprician a desvalorizar e gastar la mercandisa !

 
- Los falsaris del trabalh vertadièr se son plan ameritats lor mesa al caumatge. Suls mercats de l’estiu, amagat jos una berreta de Macarèl, lo pichon paire Nicolau ensajarà de vos vendre vertadièrs pelardons de craba bruna !

-  Los bicicletaires que ròdan suls trepadors. Se pòt pas mai caminar tranquille !

-  L’anóncia pendent una setmana sus França-3 del film sus la sòrre Sorire : nos valguèt lo plaser d’ausir mai d’un còp que lo sant Domenge èra un brave tipe ! E òc, aviá combatut nòstres aujòls erètges !

-  Lo debanament del Grand Prèmi de Formula-1 dins lo país plan democratic del Bahrein.

-  Aquela istòria de la presidenciala sul permés de menar quasi a res-non-còsta pels joves. Pensatz qu’es una vesion d’avenir, a l’ora de la montada del prètz del petròli e del demesiment de la resèrva. Val mai aprene a dalhar la pastura per noirir l’ase que menarà las carriòlas de deman (Per mesura de precaucion, interdire de faire venir d’ases del costat de Traussan ! ! !) De mai, se poirà organizar de pertot de Grand Prèmis de Formula-1 amb los concurrents crincats sus las esquinas asinièras !

-  Las questions joslevadas pel Legeire dins un corrièr recent : " Una despacha "AFP" represa per la premsa d'aquestes jorns anoncia que los pescaires d'anchòias e de sardas de La Novèla devon demorar al pòrt qu'aquelis peisses son venguts tròp pichons e morisson joves... Ambe lo prètz del gazòli, val pas mai lo còp d'anar pescar de menudalha... Una autra despacha  raconta l'enquista que se mena sul naufragi fa un an d'un setantenat  d'escapats de Libia ...Pr’aquò d'avions e de bastiments de la marina francesa los avián reperats e mai fotografiats mas se diguèron que valiá pas lo còp de gastar de gazòli per anar pescar aquela menudalha... Conclusion : lèu-lèu, lo "Bestiari" del Joan-Maria Petit e sa "sarda a l'òli" faràn figura d'inventari de bèstias desaparescudas, coma los dinosaures d'Esperasan, los immigrats legals o la solidaritat umana ... "

Remontat Roch

PAPIERÒT MENERBÉS (in La Semaine du Minervois, 17/05/12)

____________________________

*

___________________________

*