BONA VISTA SENS TVA SOCIALA

Lo Legeire se trapa a son ostal aprèp una operacion de quirurgia estetica. S’es fait empeutar un ginolh de mameta per capitar d’aurelhetas amb una fòrma bèla e tradicionala. Del temps que lo ginolh se met en plaça, a léser de gaitar lo finestron o per la finèstra :

 
" Vist a la television (sus TF1, un ser) : dos aluserpits (mascle e feme) nos explicavan las idèas falsas que caliá pas seguir per luchar contra lo freg. Donava aquò : " Per luchar contra lo freg, cal manjar gras " . Non ! primièra idèa falsa ! Per èsser mai precís, imatge a l'apièg, l'aluserpit mascle confirma : "Doncas podètz renonciar al caçolet". E se vesiá a l'escran una caçòla (dels fraires Nòt ?) fumanta barrada d'una crotz roja.

 
Segonda idèa falsa : "per luchar contra lo freg, cal beure d'alcòl" . Non ! pensavi qu'anavan mostrar alavetz un veire de Menerbés o de Corbièras barrat de roge, mas non. N'i avia pas que per (o puslèu contra) lo caçolet. 

Ma primièra reaccion foguèt de m'indignar (mai fòrt que l’Hessel) contra aquela "mesa a l'index" del solet caçolet. Perqué avián causit nòstre plat requist coma exemple e pas, te sabi pas ieu, lo mega-wimpy-burger farcit a la codena de vedèl mòrt-nat e a la crèma de burre de palma que te servisson en cò de Mc-D… ? E pensan benlèu que cal esperar l'estiu e la calorassa per se farcir un brave caçolet ? 
Ma segonda reaccion foguèt plan mai positiva : aquò èra un còp de publicitat desguisat ... pel caçolet, e non pas contra ! La publicitat (coma la politica) es l'art de la tartufariá. "Amagatz aquela popa que non saupriai véser" e tot çò qu'as pel cap es : la popa !  "Amagatz aquel caçolet que cal pas manjar" e aquò te balha sulpic l'enveja de ne manjar. Asagat d'una brava cantina de Menerbés, e d'una autra de Corbièras per far bona mesura. En realitat, aquela emission èra comanditada per la confrariá ( o l’Acadèmia ?) universala dels caçoletaires, Aquò sus TF1, a una ora d'escota granda. Un còp de mèstre ! Lor tiri mon capèl ! E ara vos daissi qu'ai un caçolet al forn.

Vist dins la carrièra, sus de panèls publicitaris : d'exagòns , ambe escrit pertot "nous, nous, nous...". E tanben, de pichons "nous" anexats, Corsega, Martinica, Guadalopa...  Es una pub (encara !) pel recensament de la populacion francesa. Doblada d'una operacion de borratge de cervèlas. Nos indican d'efièit cossi nos cal pensar las limitas del "nous". Aquelas limitas s'arrèstan a las termièras de l'exagòn. Nos cal pas ni nos pensar coma membres d'una comunautat mai pichona (aquò seriá de "comunautarisme") nimai d'una mai bèla o simplament autra (Europa, Miègterrana, lo Monde) : aquò seriá d'Utopia. Sus aquelas afichas i a pas de plaça, per exemple, per d'occitans ciutadans del monde. O mai modestament, europencs. Nos cerquèm pas dins aqueles "nous" d'aquelas polidas afichas, i sèm pas ! Serem pas recensats. "

Lo Legeire Sensat

PAPIERÒT MENERBÉS (in La Semaine du Minervois, 23/02/12)

_______________________________________

*