Discriminacion: la batèsta persèc...

A son torn, Dàvid Grosclaude s'enchipra e interven dins la batèsta contra la discriminacion de la premsa en occitan dins lo monde de l'edicion. Arser avèm apres que lo setmanièr La Setmana pòt pas èsser corectament sostengut financiarament dins lo project de creacion d'un "web" jornal encausa qu'es escrit completament en occitan. Coma o escriviái ièr, VERGONHA a la CPPAP !

PRO DE LA DISCRIMINACION !

N’i a pro de la discriminacion ! 

La Setmana a rendut public uei un corrièr qui estó enviat per la CPPAP, la Comission Paritària de la Premsa e Agéncias de Premsa.

 
Que m’avèvan assabentat deu prumèr arrefús de la CPPAP e deu medish arrefús enviat a ua enterpresa basca.

 
L’ahar qu’ei simple : La Setmana qu’a depausat un dossièr auprès de l’Estat entà aver ua ajuda (com ac preved la lei) entà méter en plaça un site en linha. Aquò que hè partida de las ajudas a la premsa entà que posca passar l’etapa deu numeric qui càmbia plan la situacion de l’informacion sus papèr. 

 
La Setmana qu’a dret a aquera ajuda mes la CPPAP que l’infòrma que serà non pas de 60o 70% com aquò deu estar per tot jornau d’informacion mes sonque de 40% pr’amor que serà un site redigit sonque en occitan. 

 
La medisha responsa qu’ei hèita a l’entrepresa basca.

Dens ua letra datada deu 5 de genèr que soi intervengut auprès de la CPPAP, deu prefècte deu Pirenèus Atlantics e tanben auprès de la DGLFLF au ministèri de la Cultura entà m’estonar a títol d’elegit delegat a las lengas de la Region Aquitània d’aquera actitud discriminatòria. 

Çò sembla la mea paraula n’a pas pesat hòrt pr’amor la decision qu’ei tostemps la medisha. 
Divés passat 3 de heurèr a Baiona qu’èi denonciat publicament aqueth ahar devant un collòqui amassat a l’universitat e qui tractava de la question de las lengas dens la constitucion. Non i avó pas arrés entà poder dar ua explicacion auta que discriminatòria a aquera decision. 

 Non soi pas mei responsable de Vistedit, l’entrepresa qui publica La Setmana ; que’n soi estat pendent 15 ans e que’m brembi d’aver viscut pendent quauques annadas las medishas camaligas a prepaus de la reconeishença deu setmanèr com un vertadèr setmanèr d’informacion. A l’epòca n’avèvam pas dret a l’ajuda d’Estat per l’edicion papèr pr’amor lo jornau èra  redigit sonque en occitan. Que’ns caló batalhar entà har cambiar lo decret en question. Qu’estó hèit en 2004 per Jean Jacques Aillagon. 

E adara que s’i tornan !!! 

De que n’i a que vòlen la pèth de las nostas lengas. 

Qu’ei insuportable e minable de horar atau los principis de basa d’ua democracia entà estauviar quauques detzenats de milierats d’euros quan sabem que son milions qui estón distribuits a la premsa entà modernizar los sons sites…Mes segurs qu’èran sites confòrmes lingüisticament . 

A quan lo contaròtle lingüistic e ideologic de la premsa ??? 

David Grosclaude 

______________________

*