LAS RESOLUCIONS SE’N VAN !

Sèm ja en febrièr, e vaquí qun Legeire d’Italia me remanda a las bonas resolucions que ne vos aviái fait part per l’annada novèla. De segur, dempuèi lo temps aviái doblidat de vos aver dit qu’anavi faire de bicicleta (o alara, an trafegat lo papieròt al burèu de La Semaine !, vesi qu’aquò coma explica). Aquí lo contengut del corrièr reçauput : "  Buongiorno ! Ara qu'ai aprés que l'Alan se va metre a la bicicleta, ai decidit de m'i metre ieu tanbens. ambe doas bravas pòchas sus la ròda de darrièr, o milhor amb una carriòla, per i metre las provisions necessàrias : botelhas de vin e tira-tap ; salcissòt d'ase bramaire e cotèl; pan, padena, òli  e resèrva d'uòus per la meleta ; pintura e pincèls per netejar lo local ; (suspausi qu'es lo local de l'IEO carrièra Trivala ? a-n-aquel moment prepausi de desvirar Aude e de l'i far passar pendent un o dos jorns per ba desruscar plan coma cal) ; drapèl occitan crompat cò de Macarèl per anar manifestar a Tolosa lo 31 de març (pro que faga Marin a l'anar e Cèrç al tornar) ; colleccion de totis los numèros de La Semaine qu'ai pas encara legits ; tapis de pregària que pòsca tanbens servir de napa de pica-nica (e recipròcament) en cas d'avenguda de la fin del monde; provision de candèlas per anar vesitar de nuèit las centralas nucleàrias tampadas; fusilh per metre sus l'espatla quand serem quilhats sus una cima de la montanha d'Alaric; broquetas per alumar lo fòc ; banasta plena de bonas resolucions per 2012 ; mas en fasent aquesta lista me demandi se seriá pas mai simple d'emportar tot aquò sus un batèu en crosièra en seguissent la còsta entre Leucata e La Novèla e en engulhant per la Robina lo Canal plan ombrejat. Me vau inscriure per aquò dins una escòla de marina italiana plan reputada que fa de corses accelerats. " E la letra es signada atal : (futur) Capitani de Vaissèl Bruno Pietrone.

 
Un autre que s’avisa que li cal prene bonas resolucions al cap de cinc ans de reflexion permanenta, aquò’s lo pichon paire Nicolau. Se met a imaginar çò qu’auriá degut pogut faire (o : pogut degut faire ?) de son temps presidenclial e elisiac. A trapat un paradís bèl sus Tèrra, en Euròpa e a portada de man (de canon ?) : Alemanha ! D’aquí, nos vendriá tot l’esper de la fin de la crisi (la chocrota es melhora d’engolir que lo caçolet ?). Per relançar lo bastiment, se parla de tornar bastir un Mur de Berlin (amb los plans de la linha Maginòt) entre França e Occitania. E vos disi res de la mesura bèla de bastir 30 % de mai de pertot. Lo Comitat de desfensa de la Trivala es a se mobilizar qu’a Carcassona parlan d’arasar lo barri (coma ba faguèt ja lo Montfòrt) per dire de poder bastir la tresena encencha de Ciutat ! ! ! E lèu, caldrà trabalhar 35 oras cada jorn : aquò menarà a unas complicacions qu’es pas de creire ! Doncas, seriá temps de prene las bonas resolucions…

Irresolgut Roch

PAPIERÒT MENERBÉS (in La Semaine du Minervois, 09/02/12)

______________________________

*